Flokkur:Daníel Jacob Jensen

Daníel Jacob Jensen.

Daníel Jacob Jensen fæddist í Skálavík á Sandey í Færeyjum 14. júní 1930 og lést 13. janúar 2013 í Reykjavík.

Daníel fór í skóla fyrir heyrnarlausa í Danmörku barn að aldri. Vegna seinni heimstyrjaldarinnar komst hann ekki heim til fjölskyldu sinnar í Færeyjum fyrr en 1945, þá orðinn unglingur. Hann kom til Íslands 1956 í atvinnuleit, settist hér að og vann sem rafsuðumaður og sjómaður, þrátt fyrir að hafa tekið sveinspróf sem klæðskeri í Danmörku.

Við komu sína til Íslands kom Daníel með nýja strauma inn í samfélag heyrnarlausra á Íslandi, enda hafði hann kynnst slíkum samfélögum á Norðurlöndum. Hann hvatti til þess að stofnað yrði Félag heyrnarlausra og vann ásamt öðrum að stofnun þess félags árið 1960, félags sem starfar enn í dag. Daníel sat í stjórn félagsins meira og minna allan fyrsta áratuginn og var formaður í 6 ár. Hann var gerður að heiðursfélaga félagsins á 50 ára afmæli þess árið 2010, fyrir mikil og óeigingjörn störf í þágu þess.

Eins og fram kemur í minningargreinum um Daníel þótti hann „skemmtilegur maður, fyndinn og frumlegur og því alltaf gott að vera nálægt honum“. Hann bjó á Íslandi í næstum sex áratugi, en var mjög stoltur af föðurlandi sínu og leit á sig sem gest, þótt honum líkaði vel við Ísland. Einn vinur hans orðaði þetta þannig að hann hafi verið Færeyingur í húð og Íslendingur í hár, eða kannski hið gagnstæða!

Daníel tók virkan þátt í varðveislu ÍTM, m.a. með því að taka þátt í rannsóknum og taka upp ýmsar frásagnir úr lífi sínu. Hann var einnig bæði viðmælandi og spyrill í viðtölum á vegum SHH. Auk þess eru til nokkrar gamlar óformlegar upptökur af Daníel með vinum sínum hér á landi. Í tilefni alþjóðlegrar viku döff 2025 eru myndbönd með Daníel birt hér á SignWiki.